CECAFA Kagame Cup: APR FC yatsinze ikipe ya kabiri biyongerera amahirwe yo kugera muri 1/4

Ikipe ya APR FC yatsinze umukino wayo wa Kabiri mu irushanwa rya CECAFA Kagame Cup ya 2024 riri kubera muri Tanzania ikomeza kuyobora itsinda C irimo.

Ni mu mukino wabaye kuri uyu Wa Gatanu Saa Mbili z’ijoro kuri Azam Complex Stadium.

Umukino watangiye amakipe yombi yigana ahererekanyiriza umupira mu kibuga hagati nta n’imwe ishaka gusatira.

APR FC niyo yatangiye kurema uburyo bwashoboraga kuvamo igitego mbere binyuze kuri za koroneri yabonaga gusa bikarangira ba myugariro bakuyeho imipira.

Ku munota wa 20 Victor Mbaoma yabonye amahirwe ku makosa yari akozwe na myugariro wa El Merriekh Bentiu FC ,Omot Sabit ahereza umupira mugufi umunyezamu ariko birangira uyu rutahizamu wa APR FC agiye gake.

Ku wa 27 iyi kipe ya El Merriekh Bentiu FC yo muri Sudani nayo yabonye amahirwe kuri kufura nziza bari babonye ariko itewe na Omot Sebit atera ishoti ry’abana.

Mbere yuko igice cya mbere kirangira APR FC yarase igitego cyari cyabazwe kuri kufura yaritewe na Ruboneka Jean Bosco maze umupira usanga Niyibizi Ramadhan arekura ishoti ariko birangira umunyezamu yihambiye arikuramo.

Mu gice cya kabiri nabwo ikipe y’Ingabo z’igihugu yaje ikomeza gusatira binyuze ku barimo Niyibizi Ramadhan warurikurekura amashoti yiganjemo aremereye kandi ya kure.

Ku munota wa 62 El Merriekh Bentiu FC nayo yaremye uburyo imbere y’izamu ku ishoti ryari riremeye rirekuwe na Lam Wuor Diew ariko birangira ba myugariro ba APR FC baryitambitse.

Igitego cyari cyabuze cyaje kuboneka ku munota wa 70 gitsinzwe na rutahizamu ukomoka muri Mauritania , Mamadou Sy ku mupira yarahawe na Ruboneka Jean Bosco wanagizwe umukinnyi w’umikino.

APR FC yaryamye kuri iki gitego kugeza umukino urangiye, ihita yegukana intsinzi ya kabiri ndetse ikomeza kuyobora itsinda C n’amanota 6.