Ubwongereza: Abimukira bagomba koherezwa mu Rwanda batangiye gufatwa

 Abategetsi b’u Bwongereza batangiye gufunga abimukira mu rwego rwo kwitegura koherezwa mu Rwanda mu byumweru icyenda cyangwa 11 biri imbere, nk’uko guverinoma yabitangaje kuri uyu wa Gatatu, ishyira urufatiro kuri politiki yo kugenzura abinjira n’abasohoka ya Minisitiri w’intebe Rishi Sunak.

Inteko ishinga amategeko mu kwezi gushize yemeje itegeko riharura inzira yo kohereza abasaba ubuhungiro mu Rwanda binjiye mu Bwongereza nta burenganzira. Sunak yifuza ko indege za mbere zahaguruka muri Nyakanga nkuko iyi nkuru dukesha Reuters ivuga.

Muri uyu mwaka, abimukira barenga 7.500 bageze mu Bwongereza mu bwato buto bava mu Bufaransa. Guverinoma ivuga ko iryo tegeko rishya rizabuza abantu gukora urugendo ruteye akaga bambuka English Channel. Abantu batanu bapfuye bagerageza kwambuka mu cyumweru gishize.

Amashusho yashyizwe ahagaragara na minisiteri y’umutekano w’imbere mu Bwongereza ku wa Gatatu yerekanaga umugabo washyizwe mu modoka n’abashinzwe umutekano b’urwego rushinzwe abinjira n’abasohoka, undi asohorwa mu nzu ye n’amapingu.

Kuri uyu wa Gatatu, itariki 1 Werurwe, minisitiri w’umutekano mu gihugu, James Cleverly, mu ijambo rye yagize ati: "Amatsinda yacu yitangiye kubahiriza amategeko arimo gukora ku buryo bwihuse kugira ngo bafate byihuse abadafite uburenganzira bwo kuba hano kugira ngo dushobore guhagurutsa indege."

Ihuriro ry’abakozi rihagarariye abakozi ba Leta bashobora guhabwa amabwiriza yo gufasha gushyiraho iyi politiki yavuze ko ryatangije ikirego mu mategeko kubera ko abanyamuryango baryo bashobora gusabwa kurenga ku mategeko mpuzamahanga.

Ibi biravugwa mu gihe ngo benshi mu basaba ubuhungiro bari bamaze kwemezwa ko bazoherezwa mu Rwanda hatazwi aho bari ndetse minisiteri y’umutekano w’imbere mu gihugu irabyemera.

Inyandiko zo muri iyi minisiteri zerekana ko mu basaba ubuhungiro 5.700 bateganijwe koherezwa mu cyiciro cya mbere, leta idafite amakuru y’abagera ku 3.557 muri bo.