UN irabona intambara yeruye y'u Rwanda na Congo - IMPAMVU

Intumwa Ihagarariye umuryango w'Abibumbye mu karere k'ibiyaga bigari iraburira amahanga ko hatagize igikorwa u Rwanda na Congo bishobora kwisanga mu ntambara yeruye igendeye ku bimenyetso bihari.

Umuryango w’Abibumbye (UN) urabona ko intambara yeruye hagati y’u Rwanda na Repubulika ya demukarasi ya Congo (RDC) ishoboka, mu gihe abayobozi bo muri ibi bihugu batakwicarana ngo baganire, bacoce ibibazo biri hagati yabyo.

Ibi byagaragajwe n’intumwa y’Umunyamabanga Mukuru wa UN mu karere k’ibiyaga bigari, Huang Xia, imbere y’akanama k’uyu muryango gashinzwe umutekano, i New York kuri uyu wa 17 Ukwakira 2023.

Xia yagize ati: “Muri Masisi na Rutshuru twabonye imirwano yubura. Ibyago by’imirwano yeruye hagati y’u Rwanda na RDC bikomeza gushinjanya gufasha imitwe yitwaje intwaro, M23 ku ruhande rumwe na FDLR ku rundi, birahari. Ukongera ingabo, nta biganiro byo ku rwego hejuru bitaziguye bibaho, ndetse n’imvugo z’urwango ziyongera ni ibimenyetso bihangayikishije tudakwiye kwirengagiza.”

Iyi ntumwa yasabye ko habaho ibiganiro hagati y’u Rwanda na RDC, kugira ngo byirinde intambara. Yagize ati: “Ntabwo nasoza ntagaragaje uburyo ari ngombwa ko dipolomasi ishyirwa imbere, ibiganiro bigakomeza, hashakwa igisubizo gikwiye ku mahoro, umutekano n’iterambere ry’akarere k’ibiyaga bigari.”

Nyuma yo kumva ijambo rya Xia, Ambasaderi wungirije w’u Rwanda muri UN, Kayinamura Robert, yagaragarije akanama gashinzwe umutekano ko imitwe yitwaje intwaro irimo FDLR yamaze kwinjizwa mu ihuriro rya Wazalendo rifatwa nk’Inkeragutabara za RDC.

Yagize ati: “Uburasirazuba bwa RDC bucumbikiye imitwe yitwaje intwaro idahungabanya gusa RDC, ahubwo ihungabanya n’ibihugu bituranye. Imitwe irenga 100 ikorera mu burasirazuba bwa RDC, irimo FDLR n’indi mitwe iyishamikiyeho yamaze gushyirwa muri Wazalendo.”

Ni mu gihe uwari uhagarariye RDC imbere y’aka kanama na we yabwiye akanama ka UN ko u Rwanda rwohereje ingabo, zihisha muri M23, zikaba ziri guhungabanya igihugu cyabo. Kuri FDLR, yavuze ko aka kanama ari ko gakwiye gufata ingamba zo kurandura uyu mutwe witwaje intwaro.

Iyi ntumwa ya RDC yagize iti: “FDLR iravugwa, abantu barayivuga, igarukwaho n’u Rwanda. Nk’uko Minisitiri w’ububanyi n’amahanga, Christophe Lutundula, yabivuze tariki ya 28 Nzeri 2023, abagize FDLR si Abanyekongo, akanama gashinzwe umutekano gakwiye kuzamura umugambi wo kurandura FDLR kandi RDC izabigiramo uruhare.”

Umwuka mubi hagati y’u Rwanda na RDC watutumbye mu ntangiriro z’umwaka w’2022 nyuma y’aho M23 yari yeguye intwaro mu mpera za 2021. Kuva ubwo, buri ruhande rwagiye rushinja urundi ubushotoranyi kenshi, habaho no kwihanangirizanya.