Afurika y'Epfo yavanye indaya mu ngabo !
Afurika y'Epfo yatumijeho Abasirikare bayo bashinjwa kwijandika mu buraya
Abasirikare b'Afurika y'Epfo bavuzweho kwijandika mu buraya kurusha uko bita ku kazi kabajyanye ko kugarura amahoro muri Repubulika Iharanira Demukarasi ya Congo bakaniwe urubakwiriye.
Igisirikare cy'Afurika y'Epfo cyahamagaje mu gihugu Abasirikare umunani bacyo bashinjwa imyitwarire mibi yo kujya mu buraya mu butumwa barimo bwo kugarura amahoro mu Burasirazuba bwa Repubulika Iharanira Demukarasi ya Congo.
Abo basirikare bacyekwa bari mu butumwa bwa MONUSCO mu ntara ya Kivu ya Ruguru. Mu cyumweru gishize bwatangaje ko bwafashe ingamba zirimo kubahagarika no kubafunga mu gihe harimo gukorwa iperereza.
Stephane Dujjaric, Umuvugizi w'Umunyamabanga mukuru wa ONU, mu cyumweru gishize yatangaje ko abo basirikare "Mu gihe cy'amasaha y'umukwabu abo basirikare bagiye mu kabari kazwiho kuba ahantu hakorerwa uburaya cyane" hafi y'umujyi wa Beni.
Yongeyeho ko Abapolisi bo muri ubu butumwa bageze ahabereye ibyo "basagariwe kandi bagakangwa n'abagize izo ngabo." ubwo bari bagiye guta muri yombi abashinjwa.
Dujjaric yavuze ko iperereza ryatangiye kuri abo basirikare bashinjwa kurenga ku mategeko ngengamyitwarire aranga abasirikare bari mu butumwa bwa ONU.
Mu itangazo ryo ku cyumweru igisirikare cy'Afurika y'Epfo cyatangaje ko cyahamagaje abo basirikare kubera uburemere bw'ibyo baregwa.
Aba basirikare bakigera muri Afurika y'Epfo nabo babahase ibibazo ku bibavugwaho.
Igisirikare cy'Afurika y'Epfo ariko kivuga ko ONU yarenze ku mabwiriza yo gutangaza ibirego nk'ibi.
Iki gisirikare kivuga ko cyagombaga kubanza kumenyeshwa ibijyanye n'imyitwarire y'Abasirikare bacyo kitagombye kubyumva mu bitangazamakuru.
Si ubwa mbere ingabo za MONUSCO zivuzweho imyitwarire mibi ijyanye no gukora ubusambanyi. Kuko mu 2017 abasirikare bayo batanu barezwe ibirego nk'ibyo ndetse umwe muri bo ashinjwa gutera inda umwana w'Umunye-Congo utarageza ku myaka y'ubukure.
Kuva mu kwezi k'Ukuboza umwaka ushize, Repubulika Iharanira Demukarasi ya Congo yakunze kumvikana ivuga ko idashaka izi ngabo ku butaka bwayo kuko ngo mu myaka irenga 25 zihamaze ntacyo zakoze kigaragara kijyanye no kugarura amahoro muri iki gihugu cyakunze kwibasirwa n'imitwe yitwaje intwaro.