Ingabo z'u Burundi zigiye guhangana n'umutwe wa M23

Hashingiwe ku masezerano ubutegetsi bw'u Burundi bwagiranye n’ubwa Repubulika ya demukarasi ya Congo, Ingabo z’u Burundi zambariye kurwanya umutwe witwaje intwaro wa M23 mu ntara ya Kivu y’Amajyaruguru.

Tariki ya 8 Nzeri 2023 byavuzwe ko izi ngabo ziri mu ntara ya Kivu y’Amajyepfo zahawe impuzankano z’iza RDC, izo zari zisanganwe zisubizwa mu kigo cya gisirikare cya Gatumba. Icyari kigambiriwe ntabwo cyahise kimenyekana.

Radio Inzamba Agateka kawe iravuga ko yahawe amakuru n’abasirikare bavuga ko nyuma y’aho aba basirikare bakorera ku masezerano yitwa TAFOC, batayo ya 6 n’iya 7, bahinduriwe impuzankano, boherejwe kurwanya M23 muri Kivu y’Amajyaruguru.

Umusirikare uri muri batayo yoherejwe muri ubu butumwa yagize ati: “Abarundi bahinduriwe misiyo, bajyanwa i Goma gufasha Leta ya Congo kurwanya M23. Aba mbere bagiye bambaye sivili, aba kabiri bagenda bambaye imyambaro y’igihugu cya Congo.”

Bivugwa ko izi batayo ebyiri zageze i Goma mu byumweru bibiri bishize. Indi ngo yagombaga kugera muri uyu mujyi kuri uyu wa 30 Nzeri 2023.

Kuva amakuru yo guhindura impuzankano kw’ingabo z’u Burundi yavugwa, ntacyo ubuvugizi bwacyo buravuga. Na Leta ubwayo ntacyo iravuga, gusa amarenga y’uko hari ibanga ibihugu byombi byaba bifitanye yaciwe ubwo ingabo zabwo ziri mu butumwa bwa EAC zatangaga agace ka Mushaki zari zarahawe na M23.

Amasezerano ya TAFOC yashyizweho umukono mu mwaka ushize. Ubusanzwe yari ay’ubufatanye mu kurwanya imitwe yitwaje intwaro ikorera muri Kivu y’Amajyepfo. Izi mpinduka zose zibaye nyuma y’aya masezerano yavuguruwe muri Kanama 2023 ubwo Perezida Evariste Ndayishimiye n’abayobozi bari bamuherekeje bari i Kinshasa.