FC Barcelone ishobora kwirukanwa muri UEFA Champions League kubera uburiganya
FC Barcelone yahamwe n'ibyaha bya ruswa
Ikipe ya FC Barcelona ikina shampiyona y'icyiciro cya mbere muri Espagne, ishobora gukurwa mu mikino ya UEFA Champions League nyuma yuko umunyamategeko atangaje ko iyi ikipe yahamwe n'icyaha cyo gutanga ruswa.
Mu ntangiriro z'uyu mwaka ni bwo hagiye hanze amakuru y'uko FC Barcelona yaba yarishyuye Enriquez Negreira wabaye umuyobozi mu ishyirahamwe ry'umupira w'amaguru muri Espagne hagati ya 2001-2018 arenga miliyoni 7 z'amapawundi, ibi bikaba byarakozwe n'uwahoze ayobora Fc Barcelona ari we Josep Maria Bartomeu.
Ibi ngo byakozwe imyaka 3 yikurikiranya, muri 2016, 2017 na 2018. Guhera icyo gihe Minisiteri ishinzwe kurwanya ruswa muri Espagne, yatangiye gukora iperereza kuri Enriquez Negreira wayoboye mu ishyirahamwe ry'umupira w'amaguru muri Espagne kuva mu 1994 kugeza muri 2018.
FC Barcelona uburyo yakoreshaga itanga iyi ruswa, yishyuraga sosiyete yitwa DASNIL 95 y'uyu musifuzi, kandi ayo mafaranga yabaga adosabanutse.
Nk'uko The Sun ibitangaza, kuri uyu wa Kane umunyamategeko witwa Joaquín Aguirre ukora mu rukiko rw'i Barcelona akaba yari ari no muri iki kibazo, yemeje ko FC Barcelona yahamwe n'iki cyaha.
Usibye FC Barcelona yahamwe n'iki cyaha kandi ngo na Negreira n'umuhungu we ndetse na Josep Maria Bartomeu nabo bahamwe n'iki cyaha.
Enriquez Negreira wahoze ari umuyobozi wungirije w'abasifuzi mu ishyirahamwe ry'umupira w'amaguru muri Espagne, ubwo batangaga ibisobanuro yari yavuze ako amafaranga yakuye muri Barcelona yari ay'akazi ku bujyanama kugira ngo afashe abakinnyi ba Fc Barcelona kumva uko bakwitwara imbere y'abasifuzi batandukanye.
Nyuma y'uko uyu munyamategeko yatangaje ko FC Barcelona yahamwe n'iki cyaha, aramutse ari byo koko, iyi kipe ishobora guhura n'ibihano bikomeye nko gukurwa mu mikino yo ku mugabane w'Iburayi irimo UEFA Champions League mu gihe kingana n'umwaka umwe.
Si ibyo gusa ahubwo yanacibwa amafaranga menshi naho Josep Bartomeu na Enriquez Negreira n'umuhungu we bo bakaba bafungwa igihe kingana n'imyaka 4.