Rutsiro: Umugabo n'umwana we w'imyaka 2 basanzwe mu mugozi bapfuye

Kuri uyu wa Mbere tariki ya 25 Nzeri 2023, mu Karere ka Rutsiro hamenyekanye amakuru y'incamugongo y'urupfu rukomeje gutera urujijo abatari bake, rw'umugabo n'umwana we basanzwe bamanitse mu migozi mu nzu bapfuye.

Ibi byabereye mu murenge wa Kigeyo mu Karere ka Rutsiro aho uyu mugabo n’umwana we w’imyaka ibiri, basanzwe mu mugozi bapfuye mu gihe ngo umugore we yari yagiye kwa muganga.

Umunyamabanga Nshingwabikorwa w’Umurenge wa Kigeyo, Déogratias Rutayisire, yavuze ko aya makuru na we yayamenye.

Agira ati “Amakuru dufite ni uko umugabo yari yagiranye ikibazo n’umugore we bararwana nyuma uwo mugabo aza gusubira mu kazi ke ko guteka capati, nyuma nibwo baje gusanga umugozi w’inzitiramibu umuri mu ijosi n’umwana we amanitse.”

Yavuze ko urupfu rw’aba bantu rukirimo urujijo ndetse iperereza ryatangiye kugira ngo hamenyekane uko byagenze.