Umutoza w'Ubuhorandi yasezeye mu ikipe y'igihugu nyuma yo gusezerwa na Argentine

Umutoza w'Ubuhorandi, Louis Van Gaal yatangaje ko agiye kujya mu kiruhuko nyuma yo gusezererwa na Argentine hitabajwe Penaliti.

Van Gaal afite imyaka 71 kandi ahanganye n'uburwayi bwa Kanseri ya prositate. 

Nk'uko byamugendekeye mu mwaka wa 2014 mu gikombe cy'isi cyabereye muri Brazil, n'ubwo ikipe ye yari yizeye insinzi, yongeye gusezererwa na Argentine hitabajwe za Penaliti.

Yagize at: "Sinzakomezanya n'ikipe y'igihugu. Ibi ndabikorera ikipe. Bivuze ko uyu ari wo mukino wa nyuma nkinanye na yo. Twagiranye ibihe byiza. Mu by'ukuri birababaje gusezererwa gutya cyane ko nakoze ibishoboka byose kugirango bitabaho.

Muri Brazil hari amakosa nari nakoze gusa iri joro ntacyo nishinja."

Gaal asezeye mu ikipe y'igihugu adatsinzwe umukino n'umwe kuva yasezererwa na Argentine mu gikombe cy'isi mu myaka 8 ishize ndetse akaba yavuze ko iri joro na bwo atatsinzwe.

Yagize ati: "Mu mikino 20 natoje nta numwe twigeze dutsindwa. Sinibuka neza iyo natsinze gusa mwabishaka muri google. Mushobora kwandikamo Dutch team, Louis Van Gaal. Sintekereza ko uyu munsi twatsinzwe umukino. Twatsinzwe gusa Penaliti."