N'agahinda kenshi Neymar wemeye agakinana imvune yaciye amarenga yo kutazongera gukinira ikipe y'igihugu nyuma yo gusezererwa nabi
Brazil yasezerewe na Croatia
Neymar yarize arahogora kubera gusezererwa muri 1/4
Neymar Yaremeye akinana imvue gusa birangira ikipe ye isezerewe mu buryo bwayibabaje cyane
Neymar Jr yaraye atangaje ko atahamya 100% ko azongera gukinira ikipe y'Igihugu cye cya Brésil, nyuma yo gusezererwa nabi mu mikino y'Igikombe cy'Isi cya 2022 gikomeje kubera muri Qatar.
Brésil yaraye itashye itarenze ¼ cy'irangiza, nyuma yo gusezererwa na Croatie kuri Penaliti 4-2. Ni nyuma y'uko iminota irenga 120 y'umukino yari yarangiye amakipe yombi anganya igitego 1-1.
Neymar ni we wari wafunguriye Brésil amazamu ubwo yayitsindiraga igitego ku munota wa 105+1; gusa Croatie iza kwishyura iki gitego mu minota itatu ya nyuma y'umukino ibifashijwemo na Bruno Petkovic.
Penaliti ebyiri zahushijwe na Rodrygo cyo kimwe na myugariro Marquinhos ni zo zashyize iherezo ku nzozi z'abanya-Brésil bahabwaga amahirwe yo kwegukana Igikombe cy'Isi.
Nyuma y'uyu mukino Neymar iyi kipe yagenderagaho yatangaje ko nta gihamya afite y'uko azongera gukinira ikipe y'Igihugu cye.
Yagize ati: "Sinavuga ko hari imiryango mfunze mu kipe y'igihugu, ariko sinahamya 100% ko nzagaruka. Nkeneye umwanya uhagije wo gutekereza kuri ibi, ku cyaba cyiza kuri njye ndetse no ku kipe y'igihugu."
Neymar utigeze atera Penaliti mu ijoro ryakeye, yaraye yujuje ibitego 77 amaze gutsindira Brésil anganya n'igihangange Pele.
Brésil akinira yaraye isezerewe mu gihe mu Gukombe cy'Isi cya 2018 yari yasezerewe na bwo itarenze ¼ cy'irangiza, nyuma yo gutsindwa n'Ikipe y'igihugu y'u Bubiligi igitego 1-0.
Mu Gikombe cy'Isi cya 2014 yari yacyakiriye bwo yasezerewe muri ½ cy'irangiza, nyuma yo kunyagirwa n'u Budage ibitego 7-1. Ni umukino Neymar atagaragayemo kuko yari yaravunitse.
Uyu rutahizamu wa PSG yavuze ko uburyo basezerewemo ari bubi kurusha mu Gikombe cy'Isi cyo muri 2018.
Ati: "Ibyiyumvo ni bibi cyane, ndatekereza ko ari ibyiyumvo bibi kurusha ibyo mu Gikombe cy'Isi giheruka. Biragoye kubona amagambo yasobanura ibi bihe. Twahatanye kandi ntewe ishema na bagenzi banjye, ntewe ishema n'imico bagaragaje yo gutinyuka bagatera Penaliti."
Neymar yaciye amarenga y'uko ashobora gusezera mu kipe y'igihugu ya Brésil, mu gihe Adenor Leonardo Bacchi 'Tite' wari umutoza wayo mukuru yamaze gufata icyo cyemezo.