Maroc ibaye ikipe imwe rukumbi ya Afurika yinjiye muri 1/4 cy'igikombe cy'isi Qatar2022
Hitabajwe penariti ikipe y'igihugu ya Espagne yatsinzwe n'ikipe y'igihugu ya Morocco ihagarariye umugabane w'Afuruka, mu mikino ya 1/8 mu gikombe cy'isi cy'uyu mwaka kiri kubera muri Qatar.
Mu mukino watangiye gukinwa saa kumi n’imwe kuri Education City Stadium, ikipe y'igihugu ya Espagne yazamutse ari iya 2 mu itsinda E yatsindiwe kuri penariti n'ikipe y'igihugu ya Morocco yazamutse ari iya mbere mu itsinda F ihita yerekeza 1/4.
Abasore ba Morocco babanje mu kibuga : Bono; Mazraoui, Aguerd, Saïss, Hakimi; Amrabat, Amallah, Ounahi; Boufal, En-Nesyri, Ziyech.
Ikipe y'igihugu ya Espagne yatangiye ikina neza, kuko mu minota 4 ya mbere Morocco yari itari yakoza ibirenge mu kibuga cya Espagne. Espagne yakomeje guhererekanya umupira neza ariko ntihagire ikivamo, kubera ko abasore ba Morocco bose bari bari gukinira inyuma.
Abasore 11 Luis Enrique wa Espagne yabanje mu kibuga: Unai Simón; Marcos Llorente, Rodri, Laporte, Jordi Alba; Gavi, Busquets, Pedri; Ferran Torres, Asensio, Dani Olmo.
Ku munota wa 10 Morocco yaherukaga muri 1/8 mu myaka 36 ishize yabonye kufura iri hafi y'izamu ku ikosa ryari rikozwe na Gavi arikorera Boufal, ariko Ziyech ayitera hejuru y'izamu gato.
Boufal yari uri hejuru mu mukino
Ku munota wa 21 Morocco yashoboraga kuba yabonye igitego ku mupira mwiza wari uhinduwe na Boufal amaze kwandagaza Marcos Llorente, ariko Ziyech awushyira ku kirenge ntiwamukundira.
Espagne yakomeje gukina neza, ariko abasore ba Morocco bakomeza kuba ibamba ubona nta bwoba bafite. Ku munota wa 26 Marcos Asensio yacomokanye umupira wenyine, ageze imbere y'izamu awutera nabi ntiyatsinda igitego.
Gavi waranzwe n'amakosa menshi mu gice cya mbere
Ku munota wa 42 Morocco yongeye guhusha ikindi gitego ku mupira wari uhinduwe na Boufal Ziyech, awugaruza umutwe habura utsinda igitego. Igice cya mbere cyaranzwe no kurata ibitego ku ruhande rwa Morocco cyarangiye rwabuze gica ari 0-0.
Igice cya kabiri cyatangiranye no gukora amakosa ku ruhande rwa Morocco, ku munota wa 53 Espagne yabonye kufura ku ikosa ryari rikorewe Gavi maze Dani Olmo arekura umuzinga w'ishoti ariko umuzamu awuhindurira icyerekezo habura utsinda.
Espagne ku munota wa 63 yakoze impinduka mu kibuga havamo Gavi na Asensio, hinjiyemo Soler na Morata. Mu minota 70 ikipe y'igihugu ya Espagne yakomeje kwiharira umupira inashaka uburyo bw'igitego, ariko abasore ba Morocco bakomeza kwihagararaho igitego kirabura.
Iminota 90 y'umukino yarangiye hongerwaho iminota 5 yaranzwe no kwataka cyane kwa Morocco ishaka igitego, ariko rubura gica irangira ari 0-0.
Umunyezamu wa Morocco wakuyemo penariti 2
Umukino wongereweho iminota 30 kugira ngo haboneke ikipe itsinda igakomeza 1/4, iminota 15 y’agace ka mbere yaranzwe no kwatakana kw’amakipe yombi ashaka igitego kububi no kubwiza.
Ku munota wi 105 umuzamu wa Morocco Yassini Bounou yarekuye umupira mureremure imbere y'izamu rya Espagne maze Marcos Llorent arekura ishoti ariko barikuraho. Iminota 15 y’agace ka kabiri yakomeje gukinwa Espagne igerageza kwataka, ariko abasore ba Morocco bakomeza kugarira neza igitego kirabura.
Abanya - Morocco bahise bashima Allah nyuma yo kubona intsinzi
Ku munota wa 117 Marcos Llorent wa Morocco yakomeje gutera amahirwe inyoni yo gutsinda arata ikindi gitego, atindana umupira mu maguru ari imbere y'izamu wenyine. Iminota 30 y'inyongera yarangiye bikiri 0-0 hitabazwa Penariti.
Penariti za Morocco zatewe na:
Abdelhamid Sabir arayinjiza
Hakim Ziyech arayinjiza
Badr Banoune arayinjiza
Achraf Hakimi arayinjiza
Penariti za Espagne zatewe na:
Pablo Sarabia ayikubita igiti cy'izamu
Carlos Soler yayiteye umuzamu wa Morocco ayikuramo
Sergio Busquet nawe yayiteye Yassini Bounou nayo ayikuramo.
Nyuma y'imyaka 36 Morocco ihagarariye umugabane w'Afuruka yahise ibona itike ya 1/4 itsinze penariti 3-0 bwa Espagne, mu gikombe cy'isi cy'uyu mwaka kiri kubera muri Qatar.
Abakinnyi ba Espagne bibaza ibibabayeho