UCL: Mohamed Salah yaciye agahigo naho FC Barcelone ihagarara mu mayirabiri
Imikino ya UEFA Champions League yakomeje mu ijoro ryo kuwa Kabiri rishyira kuwa Gatatu, FC Barcelona itari mu bihe byiza iharura inzira yerekeza muri Europa League, Club Brugge yo mu Bubiligi ikomeza gutungurana naho Mhammed Salah aca agahigo.
Mu ijoro ryo kuri uyu wa Gatatu, Hakinwaga imikino y'umunsi wa Kane, ahari hatahiwe amakipe yo mu matsinda kuva kuri A kugeza kuri D, nyuma y'aho amakipe yo mu matsinda yo kuva kuri E kugeza kuri H yo yari yakinnye kuwa Kabiri.
Mu itsinda D, Napoli yanyagiye Ajax Amsterdam ibitego 4 kuri 2, ihita yuzuza amanota 12 ku rutonde ndetse ihita iba ikipe ya kabiri ibonye itike ya ⅛, nyuma ya Manchester City yari yabikoze ku munsi wabanje.
Mu wundi mukino, Liverpool yanyagiye Rangers yo muri Scotland ibitego 7-1, yuzuza amanota 9 ku rutonde, aho ihagaze ku mwanya wa kabiri, igakurikirwa na Ajax Amsterdam ifite amanota 3 hagaheruka Rangers itarabona inota.
Liverpool yatsindiwe na Firmino winjije bibiri, Darwin Nunez, Harvey Eliott na Mohammed Salah winjije ibitego bitatu byakurikiranye mu minota 6 n'amasegonda 12 bigatuma yandika amateka yo gutsinda Hattrick yihuse muri Champions League.
Mohammed Salah
Agahigo ko gutsinda ibitego bitatu byegeranye muri Champions League, kari gafitwe na Bafetimbi Gomis wabitsindiye Olympique Lyonnais mu minota 8 ubwo bakinaga na Dinamo Zagreb muri 2011.
Mu itsinda B, Atletico Madrid yanganyije na Club Brugge yo mu Bubiligi Ubusa ku busa naho FC Porto itsindira Bayern Leverkusen mu Budage ibitego 3-0.
Club Brugge iyoboye itsinda n'amanota 10 yahise ibona itike ya ⅛, iba ikipe ya kabiri yo mu Bubiligi ibashije kurenga amatsinda ya UEFA Champions League, nyuma y'aho KAA Gent yabikoze muri 2015. FC Porto ni iya kabiri ku rutonde n'amanota 6, Atletico Madrid ikagira 4 naho Bayern Leverkusen ifite amanota 3.
Club Brugge yaratunguranye bikomeye
Mu itsinda C, Bayern Munich yatsinze Viktoria Plzen ibitego 4-2 naho FC Barcelona inganya ibitego 3-3 na Inter Milan, aho yatsindiwe na Ousmane Dembele ndetse na Robert Lewandowski winjije ibitego 2, Inter yo itsindirwa na Nico Barella, Lautaro Martinez ndetse na Robin Gosens.
Bayern Munchen yujuje amanota 12 ibona itike ya ⅛, aho ikurikiwe na Inter Milan ifite 7, FC Barcelona ifite amanota 4 ndetse na Viktoria Plzen yo muri Repubulika ya Czech ifite ubusa.
Barcelona isa n'iyaharuye inzira yerekeza muri Europa League, kuko imibare isabwa kugira ngo igere muri ⅛ cya Champions League, ivuga ko byashoboka mu gihe yatsinda imikino ibiri isigaye kandi Inter Milan ntibashe gutsinda umukino n'umwe mu yo isigaje izahuramo na Plzen ndetse na Bayern Munchen kimwe na Barcelona.
Lewandoskwi yatsinze ibitego byiza ariko intsinzi irabura
Mu itsinda D, Marseille yatsinze Sporting CP ibitego 2-0, naho Tottenham itsinda bigoranye Eintracth Frankfurt ibitego 3-2, aho yinjirijwe na Heung Min Son watsinze bibiri akunganirwa na Harry Kane, mu gihe Frankfurt yo yatsindiwe na Daichi Kamada ndetse na Faride Alidou.
Muri iri tsinda nta kipe irabona itike ndetse ntayasezerewe, kuko Tottenham iyoboye urutonde n'amanota 7, igakurikirwa na Marseille ndetse na Sporting CP bangaya 6 mu gihe Eintracth Frankfurt ifite amanota 4.
Min Son wa Tottenham Spurs yishimira igitego
Imikino y'umunsi wa Gatatu ari nawo ubanziriza uwa nyuma mu matsinda ya UEFA Champions biteganijwe ko izakinwa tariki 25 na 26 Ukwakira 2022.