Covid-19: MINISANTE yahagaritse kubanza gupimwa umuriro mbere yo kwinjira ahateranira abantu benshi

Ku gicamunsi cy'uyu wa Kane tariki 17 Werurwe 2022, Minisiteri y'Ubuzima yasohoye itangazo rimenyesha abaturarwanda bose ko ibikorwa byo gupima umuriro ku marembo y'ahahurira abantu benshi bitagikenewe ndetse ko bitagifatwa nk'imwe mu ngamba zo kwirinda ikwirakwira rya Covid-19.

Kuva Covid-19 yagera mu Rwanda mu ntangiriro za 2020, kugira ngo winjire mu nyubako zihuriramo abantu benshi wabanzaga gupimwa umuriro kuko umuntu wabaga afite umuriro mwinshi cyane byabaga ari kimwe mu bimenyetso by'uko ashobora kuba arwaye Covid-19. Kuri ubu Minisiteri y'Ubuzima yamaze guhagarika ibi bikorwa kuko yasanze bitagikenewe.

Itangazo ryateweho umukono na Dr Ngamije M. Daniel Minisitiri w'Ubuzima mu Rwanda (MINISANTE), rirasaba abahagarariye ibigo bya Leta n'ibyigenga, abategura gahunda zihuriza hamwe abantu benshi "guhagarika ibikorwa byo gupima umuriro aho abantu binjirira". Iyi Minisiteri ivuga ko ibi bikorwa "bitagikenewe kandi bitagifatwa nk'imwe mu ngamba zo kwirinda Covid-19".

MINISANTE yaboneyeho kandi gushishikariza abanyarwanda gukomeza kwitabira kwikingiza byuzuye, harimo no guhabwa urukingo rwo gushimangira ku bujuje ibisabwa, kwambara agapfukamunwa no gukaraba intoki kenshi kandi neza.