Ijambo Gen. Kabarebe yabwiye APR FC nyuma yo gusezererwa muri CAF Champions League

Umuyobozi w’icyubahiro wa APR FC, Gen. James Kabarebe kuri uyu wa 30 Ukwakira 2021 yasuye iyi kipe mbere y’uko itangira shampiyona mu mwaka w’imikino mushya, 2021/2022 na nyuma yo gusezererwa mu ijonjora rya CAF Champions League.

. Gen. James Kabarebe yasuye APR FC

. APR FC yasezerewe muri CAF Champions League

Muri iri jonjora, APR FC yasezereye Mogadishu City Club (Banadir) yo muri Somalia, iyitsindiye i Kigali ibitego 2-1 tariki ya 19 Nzeri 2021, ariko isezererwa na Etoile du Sahel yo muri Tunisia, itsindiwe hanze ibitego 4-0 tariki ya 23 Ukwakira nyuma yo kunganyiriza i Kigali igitego 1-1.

Gen. Kabarebe abona APR FC yaragoye aya makipe yombi ubwo yayakiriraga i Kigali, agashimangira ko hari intambwe imaze gutera. Ati: “Imikino mumaze gukina mu ruhando mpuzamahanga twarayibonye. Twahuye n’amakipe akomeye ariko yose yavuye hano mu Rwanda yiyushye akuya. Ku bw’umupira nabonye hano, hari ikintu cyiza mumaze kugeraho bigaragarira buri umwe.”

Yakomeje avuga ko kera nta kindi amakipe yo hanze yatekerezaga keretse gusa gutsindira iyi kipe mu Rwanda ibitego byinshi. Gusa ngo ubu si ko bikimeze. Ati: “Kera amakipe yo hanze yazaga mu Rwanda azi ko aje kuhatsindira ndetse ibitego byinshi, ariko ubu ikipe isigaye iza izi ko bitari buyorohere gutsindira hano. Ibyabaye kuri aya makipe aheruka hano murabizi.”

Mu gutangira shampiyona, APR FC irakina na Gicumbi FC iherutse kuzamuka mu cyiciro cya mbere, kuri uyu wa 31 Ukwakira 2021. Iyi kipe y’ingabo kandi nyuma yo gusezererwa muri Champions League, izakomeza ijonjora rya CAF Confederations Cup yatomboyemo RSB Berkane yo muri Maroc.