Cristiano Ronaldo yafashije Manchester United kwikura mu nzara za Atalanta yari yayishyize ku munigo

Ikipe ya Manchester United ibifashijwemo na Cristiano Ronaldo, yatsinze Atalanta ibitego 3-2 nyuma yo kuyigaranzura.

. Cristiano Ronaldo yakuye Manchester United mu menyo ya rubamba

. Manchester United yatsinze Atalanta bigoranye ibifashijwemo na Cristiano Ronaldo

 

Manchester United y'umutoza Ole Gunnar Solskjaer yaherukaga gutsindwa na Leicester City ibitego 4-2, yari yakiriye Atalanta i Old Trafford mu mukino wa UEFA Champions league wa gatatu wo mu tsinda F.

Nta wari uzi ko Manchester United iza kwegukana intsinzi muri uyu mukino nyuma yo kurangiza iminota 45 y'igice cya mbere iri inyuma n'ibitego 2-0.

Atalanta yari yafunguye amazamu ku munota wa 15 w'umukino ibifashijwemo na Mario Pasalic cyo kimwe na myugariro Merih Demiral wayitsindiye igitego cya kabiri ku munota wa 28.

Iminota 45 y'umukino yasize umutoza Ole avugirizwa induru n'abafana mu buryo bwo kumukoba, gusa ibitego byo ku munota wa 53 w'umukino n'uwa 75 bya Marcus Rashford na Harry Maguire bifasha Man United kugaruka mu mukino.

Kera kabaye ku munota wa 81 ni bwo Manchester United yabonye igitego cy'intsinzi cya Cristiano Ronaldo, ku mupira yari ahinduriwe na Luke Shaw mbere yo kuwutereka mu izamu n'umutwe.

Gutsinda uyu mukino byakuye Manchester United ku mwanya wa nyuma mu tsinda F ifata uwa mbere n'amanota atandatu, mu gihe hakibura imikino itatu yo gukina.

Gutsinda Atalanta kandi byatumye Manchester United yongera kwigirira icyizere mbere yo guhura na Liverpool mu mukino wa shampiyona uteganyijwe ku Cyumweru.

Mu yindi mikino yabaye:

FC Barcelona yabonye intsinzi ya mbere nyuma yo gutsinda Dynamo Kyiv yo muri Ukraine igitego 1-0 cyatsinzwe na Gerard Pique.

Uko imikino yose yakinwe kuri uyu wa Gatatu yagenze