Minisitiri w’Intebe w’u Burundi yaburiye abaturage ko inkingo za covid-19 zica cyangwa zigatera indwara

Minisitiri w’Intebe w’u Burundi, CPG Alain-Guillaume Bunyoni yaburiye Abarundi bifuza kwingiza icyorezo cya Covid-19 ko hari ababikora bakarwara cyangwa bagapfa, bityo uwifuje kubikora agomba kwirengera izi ngaruka.

. Inkingo za covid-19 zirica

. Inkingo za covid-19 zitera indwara

. Ibyo wamenya ku nkingo za covid-19

 CPG Bunyoni yabitangarije mu Ntara ya Rutana avukamo tariki ya 17 Ukwakira 2021 mbere y’uko abatuye mu Burundi babyifuza batangira kwikingiza iki cyorezo ku bushake, kuri uyu wa 18. Yagize ati: “Abikingiza bararwara, bamwe bagapfa.” 

 Uyu muyobozi yasobanuriye abaturage ko inkingo za Covid-19 zakozwe huti huti, abahanga bazikoze ntibabona umwanya uhagije wo kuzikoraho ubushakashatsi ku ngaruka zazo. 

 Kubera iyi mpamvu, ngo Leta y’u Burundi ntiyakwizera izi nkingo mu gihe n’abazikoze bagusaba kubanza kwemera ko ingaruka zizakugiraho uzazirengera, ntugire uwo ubaza. 

 Bityo rero, CPG Bunyoni yavuze ko Umurundi uzikingiza ku bushake, bikamugiraho ingaruka, ntacyo azaba Leta kuko ntiyigeze itegeka abaturage bayo kwikingiza. 

 U Burundi bwakiriye doze 500,000 z’inkingo za Sinopharm zaturutse mu Bushinwa, zikaba ari zo za mbere bwakiriye. Igikorwa cyo gukingira cyatangiriye i Bujumbura kuri uyu wa 18 Ukwakira, nta muyobozi mukuru wigeze ahagaragara bitandukanye n’uko bigenda mu bindi bihugu.