Umugore yarashe umugabo wanze ko basomana

Abapolisi n’abashinjacyaha bo muri Illinois muri Amerika batangaje, umugabo yanze gusoma undi mugore imbere y’umukunzi we birangira yishwe nyuma y’aho uwatewe utwatsi yafashe imbunda y’uyu mugabo amurasa mu gatuza.

 

Ku wa mbere, Claudia Resendiz-Florez w’imyaka 28 yafunzwe azira urupfu rwatewe no kurasa James Jones w’imyaka 29. Uyu mugore ngo yemeye ubu bwicanyi, bwabaye mu ijoro ryo ku wa kane mu rugo rw’ahitwa i Rolling Meadows, mu majyaruguru ya Chicago.

 

Polisi ntiratangaza amakuru arambuye kuri iki kibazo, ariko abashinjacyaha bo mu ntara ya Cook bavuze ibirego bitandukanye mu rukiko ku wa gatandatu.

 

Ikinyamakuru Chicago Sun-Times cyatangaje ko Resendiz-Florez, uherutse kwimukana n’uriya mugabo n’umukunzi we, yari kumwe n’umugabo n’umugore mu ijoro ry’ubwicanyi ubwo yasabaga Jones kumusoma. Ubushinjacyaha bwavuze ko Jones yanze, ahubwo, arahindukira asoma umukunzi we.

 

Nibwo ukekwaho ubwicanye yarakaye maze akura imbunda ye ku ntebe yari hafi aho, nk’uko kiriya kinyamakuru kibitangaza. Ubuyobozi bwavuze ko uyu mugore yahise arasa isasu rimwe ryafashe Jones mu gatuza.

 

Umukunzi wa nyakwigendera yahamagaye 911, ariko uwarashwe ntiyashobora kurokoka.

 

Resendiz-Florez yatawe muri yombi nta yandi mananiza ashinjwa ubwicanyi bwo mu rwego rwa mbere. Biteganijwe ko azasubira mu rukiko ku wa kabiri.