Umujenerali wirukanwe na Ethiopia akaba ayizengereje bwa mbere yagize icyo atangaza

Umukuru w'inyeshyamba zo mu Karere ka Tigray mu majyaruguru ya Ethiopia, Gen Tsadkan Gebretensae, kuva yatangira kuyobora imirwano yagize icyo atangaza, yemeza ko bazakomeza kurwana kugeza hubahirijwe ibyo basaba kugira ngo agahenge kabeho.

Gen Tsadkan Gebretensae, w'imyaka 68, yavuze ko izi nyeshyamba akuriye zishaka guhatira leta ya Ethiopia gukuraho uruzitiro rubuza imfashanyo n'abantu kwinjira muri ako karere, kandi ikemera igisubizo kinyuze muri politiki cyo gusoza intambara.

Leta ya Ethiopia ihakana ivuga ko urwo ruzitiro ntaruhari kandi yavuze ko nta biganiro yagirana n'izo nyeshyamba.

Abantu babarirwa mu bihumbi barishwe kuva intambara yatangira mu kwezi kwa cumi na kumwe mu mwaka ushize.

Abantu babarirwa muri za miliyoni na bo bataye ingo zabo kubera imirwano, buri ruhande ruyirimo rushinjwa gukora ibikorwa byo guhonyora uburenganzira bwa muntu ndetse n'ibyaha byo mu ntambara.

Abantu batari munsi ya 400,000 babayeho mu nzara, nkuko bikubiye mu kigereranyo cy'umuryango w'abibumbye (ONU/UN), kugera muri ako karere bikaba bikirimo imbogamizi.

Yavuze ko iyi ntambara yashoboraga kuba yaririnzwe, ashinja Minisitiri w'intebe wa Ethiopia Abiy Ahmed kudashaka ko habaho igisubizo kinyuze mu nzira y'amahoro ku bushyamirane hagati ya leta ya Ethiopia n'ishyaka rya Tigray People's Liberation Front (TPLF).

Gen Tsadkan ati: "Ndicuza ko ibi byabaye, ndicuza ko ibi byashoboraga kuba byaririnzwe, ariko nishimiye ko abaturage ba Tigray barwanye kandi [ubu] bari aho bashobora gusaba umwanya wabo bafitiye uburenganzira bwo kuri aka karere".

Leta ya Ethiopia yamaganye ibisabwa na TPLF byo kugirana ibiganiro n'abakuriye izo nyeshyamba, ubu zirwanira mu mutwe uhuriwemo n'indi mitwe yitwaje intwaro yo muri Tigray, wa Tigray Defence Forces ( (TDF).

Ishyaka rya TPLF ni ryo ryari ku butegetsi mu karere ka Tigray mbere yuko rihirikwa n'ingabo za leta ya Ethiopia mu kwezi kwa cumi na kumwe mu 2020.

Leta ya Ethiopia ivuga ko TPLF ari umutwe w'iterabwoba, mu gihe inyeshyamba za TPLF zo zivuga ko ari zo leta y'akarere ka Tigray yemewe n'amategeko.

Abakuru ba TPLF bashwanye na Bwana Abiy ku bijyanye n'amavugurura muri politiki, nubwo kuba TPLF yarafashe ibigo bya gisirikare by'ingabo za leta byo muri Tigray ari yo yabaye imbarutso y'igitero leta yayigabyeho.