Visi Perezida wa Kenya yasuguwe ku rwego rutigeze rubaho - Depite Ndindi Nyoro
Abari bagiye kujyana nawe bavuze ko Visi Perezida William Ruto yamaze amasaha atanu n'igice ku kibuga cy'indege i Nairobi "asuzugurwa", birangira abujijwe kujya mu ruzinduko bwite muri Uganda.
. Agasuzuguro kakorewe Visi Perezida wa Kenya, RUTO, ngo nta bundi kigeze kaboneka
. Depite Ndindi Nyoro yatangaje ko Visi Perezida Ruto yasuzuguriwe ku kibuga cy'indege mu buryo butangaje
. Visi Perezida Ruto yabujijwe kujya muri Uganda
. Uruntu runtu hagati ya Visi Perezida Ruto na Perezida Uhuru Kenyatta
Ku wa mbere nijoro, Ruto yari ayoboye itsinda ry'abantu umunani bari bagiye kurira indege bwite y'ubucuruzi kuri Wilson Airport mu mujyi wa Nairobi igiye i Kampala.
Depite Ndindi Nyoro, umwe mu bari bajyanye na Ruto bo baretse bagakomeza, yabwiye abanyamakuru ageze muri Uganda ko "atigeze abona VP [Visi Perezida]asuzugurwa kuri uru rugero".
Nyoro avuga ko hari aho basabye Ruto icyangombwa cy'amavuko, "ubundi indangamuntu ye, n'ibaruwa ivuye ku mukuru."
Amaherezo Ruto yangiwe kugenda, abo ku ruhande rwe bavuga ko babwiwe n'abategetsi ko ari "amabwiriza yaturutse hejuru", ariko aho hejuru batazi aho ari ho.
Abo ku ruhande rwe bavuga ko amategeko adategeka Visi Perezida wa Kenya gusaba uburenganzira bwo kuva mu gihugu igihe agiye mu rugendo bwite.
Nyuma yo kwangirwa kugenda, Ruto yanditse kuri Twitter ati: "Nta kibazo…reka tubirekere Imana".
Hashize igihe haboneka ukutavuga rumwe hagati ya Perezida Uhuru Kenyatta n'umwungirije William Ruto, mu gihe hateganyijwe amatora y'umukuru w'igihugu mu kwa munani mu 2022, amatora Uhuru atagomba kwiyamamazamo kuko manda ze zarangiye.
Mu 2013, Uhuru wo mu bwoko bw'aba-Kikuyu na Ruto wo mu ba Kalenjin, bashyize hamwe bumvikana gushyingura burundu amatati ya politiki ishingiye ku moko yagejeje ku mvururu ziciwemo abarenga 1,000 nyuma y'amatora ya 2007.
Bashyize hamwe, banaba abere mu rubanza mu rukiko mpuzamahanga mpanabyaha (ICC/CPI), aho bombi baregwaga uruhare mu mvururu n'ubwicanyi byo mu 2007.