Mozambique: Perezida Nyusi yashimiye ingabo za RDF zamufashije gukubita incuro inyeshyamba

Perezida wa Mozambique, Filipe Nyusi, yashimye ingabo z'u Rwanda kubera akazi kadanzwe zikomeje gukora mu ntara ya Cabo Delgado, ashimangira ko nta kiguzi gishobora kugira akazi ziri gukora.

Perezida Nyusi yabigarutseho ejo ku Cyumweru, mu ijambo yagejeje ku banya-Mozambique risobanura aho Leta igeze ikemura ikibazo cy'umutekano muke cyugarije amajyaruguru y'igihugu.

Perezida Nyusi yavuze ko kuba ingabo z'u Rwanda ziri muri Mozambique ari "igikorwa cyo gufatanya n'igihugu kidakwiye kugaragara nk'igiteye ubwoba ku ruhande rw'abanya-Mozambique."

Yunzemo ati: "Ingabo z'u Rwanda ziri hano ku bw'impamvu imwe kandi rusange yo kurokora ubuzima bw'ikiremwa muntu. Inshingano z'ingabo z'amahanga ni ugufasha igisirikare cya Mozambique kugarura umutekano."

Perezida Filipe Nyusi agaruka ku kazi kari gukorwa n'ingabo z'u Rwanda mu ntara ya Cabo Delgado, yavuze ko nta cyiguzi kibaho gishobora kugasobanura.

Ku wa Gatanu tariki ya 09 Nyakanga ni bwo u Rwanda rwatangiye kohereza muri Mozambique abasirikare n'abapolisi 1,000 ku busabe bwa Leta ya kiriya gihugu, mu rwego rwo gufasha ingabo zayo guhangana n'ibitero by'inyeshyamba zo mu mutwe w'iterabwoba wa Islamic State.

Hari amakuru avuga ko ku wa 20 Nyakanga ingabo z'u Rwanda zifatanyije n'iza Mozambique zagabye igitero kuri uriya mutwe, zikica abarwanyi bawo 30 abandi bagakwira imishwaro bahungira muri Tanzania.

Usibye iki gitero, Perezida Nyusi yavuze ko izi ngabo zanigaruriye uduce twinshi twari twarigaruriwe na Islamic State, ashimangira ko Mozambique iri gutera intambwe nziza mu guhashya iterabwoba.